Ilon Mask milliarderlar ro‘yxatida 4-o‘ringa ko‘tarilib oldi

Mask milliarderlar ro‘yxatida LVMH kompaniyalari guruhi direktori Bernar Arnodan o‘zib ketdi. Ayni vaqtda Arnoning boyligi 84,6 mlrd dollarga, Maskniki esa 84,8 mlrd dollarga baholanmoqda. Mask 3-o‘rinni egallayotgan Mark Tsukerbergdan 15 mlrd dollar “ortda” qolmoqda.

Reytingga Amazon rahbari Jyeff Bezos 188 mlrd dollar bilan yetakchilik qilmoqda. 2-o‘rinni 121 mlrd dollarga ega Bill Geyts egallamoqda.

Bloomberg’ning xabar berishicha, 49 yoshli Maskning boyligi 17 avgustda Tesla aksiyalari qimmatlashishi ortida 7,8 mlrd dollarga ko‘paydi. Umuman olganda, Tesla aksiyalari 2020 yil boshidan beri 339 foizga qimmatlashgan va buning ortida Mask ham joriy yilda 57,2 mlrd dollarga boyigan. Bu dunyodagi ikkinchi ko‘rsatkich hisoblanadi. Joriy yilda faqatgina Bezos Maskdan ko‘proq boyigan: uning boyligi yil boshidan 73 mlrd dollarga ko‘paygan. 

17 avgustda Tesla aksiyalari narxi tarixiy maksimumga erishdi. Aksiyalar 11 foizga qimmatlashib, bir donasi narxi 1845 dollargacha ko‘tarilgan. Kompaniya aksiyalari narxi Xitoyda elektromobillarga talab oshishi kutilayotgani ortida ko‘tarilgan.