Turkiya O‘zbekistondagi oltin konlarini qazib olish loyihalarida ishtirok etadi

Vazirlar Mahkamasining “O‘zbekiston Respublikasi va Turkiya Respublikasi o‘rtasida strategik sheriklik munosabatlarini yanada mustahkamlash va ko‘p qirrali hamkorlikni kengaytirish chora-tadbirlari to‘g‘risida”gi qarori qabul qilindi.

O‘zbekiston Respublikasi va Turkiya Respublikasi o‘rtasidagi kelishuvlarni o‘z vaqtida amaliy ijro etish bo‘yicha tadbirlar dasturi tasdiqlandi.

Unga ko‘ra, energetika va tog‘-kon sektorlariga «Jyengiz» kompaniyasining to‘g‘ridan-to‘g‘ri investitsiyalarini jalb qilish rejalashtirilgan.

Bunda «Jyengiz» kompaniyasi bilan ilgari «Aksa Enerji» kompaniyasi uchun ma'qullangan shartlarda elektr stansiyasini qurish loyihasini amalga oshirish bo‘yicha elektr energiyasini xarid qilish to‘g‘risida bitim va investitsiya bitimini imzolash, oltin konlarini qazib olish loyihalarida ishtirok etish bo‘yicha Turkiya tomoniga takliflar yuborish va muzokaralar o‘tkazish, qat'iy kelishuvlarga erishish nazarda tutilgan.

Chora-tadbirlarni amalga oshirish muddatlari - 2020 yil sentabr, 2020 yil avgust va 2020 yil oktabr-noyabr.

Ijro uchun mas'ul bo‘lgan shaxslar - Energetika vazirligi (A. Sultonov), Investitsiyalar va tashqi savdo vazirligi (L. Qudratov), Davlat geologiya qo‘mitasi (B. Islomov).