Trampning maxsus vakili Suriyada maxfiy muzokaralar o‘tkazgan

AQSh prezidenti Donald Tramp ma'muriyati rasmiylari shu yil boshida Suriyada prezident Bashar Asad vakillari bilan garovga olingan amerikaliklarni ozod qilish bo‘yicha maxfiy muzokaralar o‘tkazgan. Bu haqda 19 oktabr, dushanba kuni “Anadolu” axborot agentligi xabar berdi.

Ma'muriyat manbalariga ko‘ra, Trampning yordamchisi Kesh Patel va Oq uyning terrorizmga qarshi kurash bo‘yicha yuqori lavozimli rasmiysi Suriyaga uchib ketishgan.

Qayd etilishicha, ular Asad hukumati vakillari bilan uchrashgan. AQSh rasmiylari 2012 yilda Suriyada qo‘lga olingan amerikalik jurnalist Ostin Tayz va 2017 yilda Damashqda hibsga olingan amerikalik shifokor Majid Kamalmazning ozod qilinishini so‘ramoqda.

Damashqda Oq uy va Suriya rasmiylari o‘rtasidagi so‘nggi muzokaralar 2010 yilda bo‘lib o‘tgan. Qo‘shma Shtatlar 2012 yilda Asad tomonidan uning boshqaruviga qarshi bo‘lganlarga tazyiqlar o‘tkazganligiga norozilik sifatida AQSh Suriya bilan munosabatlarni uzgan edi.