Tramp Xitoyga qarshi yanada keskin choralar qabul qilishni rejalashtirdi – OAV

Tramp ma'muriyatidagi amaldorlar sanksiyaga tushadigan Xitoy kompaniyalari ro‘yxatini kengaytirish masalasini muhokama qilmoqda.

Foto: EPA/TASS

AQSh prezidenti Donald Tramp Xitoyga nisbatan keskin choralar paketini qabul qiladi. Bu haqda o‘z manbalariga tayanib Axios portali xabar berdi.

Portalning yozishicha, Oq uy Xitoyning ko‘plab kompaniyalariga qarshi sanksiyalar kiritish va ular bilan savdo aloqalarini cheklashni rejalashtirmoqda. Qayd etilishicha, cheklovlar Shinjon-Uyg‘ur muxtor viloyati va Honkongda inson huquqlari buzilishi hamda AQSh milliy xavfsizligiga nisbatan tahdid sababli joriy etiladi.

Manbalarning ma'lumot berishlaricha, Tramp ma'muriyatidagi amaldorlar sanksiyaga tushadigan Xitoy kompaniyalari ro‘yxatini kengaytirish masalasini muhokama qilmoqda.

Axios portalining yozishicha, AQSh milliy razvedkasi direktori Jon Retkliff yaqin vaqt ichida Xitoyning Qo‘shma Shtatlardagi "yovuz rejalari" to‘g‘risida ma'lumot taqdim etadi.

Tramp o‘tgan haftada 2021 yil 11 yanvardan AQSh jismoniy va yuridik shaxslariga Xitoy harbiylari bilan aloqador kompaniyalarning qimmatli qog‘ozlarini sotib olishni taqiqlovchi farmonni imzolagandi.