Germaniyada karantin yanvar oxirigacha uzaytirildi

Germaniya hukumati 2020 yil 16 dekabrda kiritilgan karantinni yanvar oxirigacha uzaytirishga qaror qildi. Bu haqda Germaniya kansleri Angela Merkel federal yerlar rahbarlari bilan o‘tkazilgan yig‘ilish natijalari bo‘yicha ma'lum qildi.  

Merkel Germaniyaning koronavirus bilan bog‘liq vaziyat og‘ir hududlarida fuqarolarga o‘z uylaridan zaruratsiz 15 km uzoqlashish taqiqlanishini tasdiqlagan. Ushbu cheklovlar hafta davomida 100 ming aholiga 200ta kasallanish holati to‘g‘ri keladigan okruglarda kuchga kiradi.

Germaniyada koronavirus tarqalishining yangi to‘lqini sababli noyabr boshida dastlab kafe va restoranlar yopilgandi, biroq bu yetarli bo‘lmagan. Dekabr o‘rtalarida cheklovlarni qat'iylashtirishga va deyarli barcha savdo nuqtalarini yopishga to‘g‘ri kelgan. Mamlakatda o‘shandan beri teatrlar, muzeylar, sartaroshxonalar, go‘zallik salonlari ishlamayapti, o‘quvchilar masofadan o‘qitishga o‘tkazilgan. Ushbu choralar 10 yanvargacha amal qilishi kutilgandi.