Kadastr agentligi direktori boshqa ishga o‘tmoqda

Xalilillo To‘raxo‘jayev faoliyatini sud tizimida davom ettiradi. Kun.uz muxbiri xabar berishicha, uning nomzodi Oliy sud raisi o‘rinbosari – Fuqarolik ishlari bo‘yicha sudlov hay'ati raisligiga ko‘rib chiqilmoqda.

• Ma'lumot uchun, O‘zbekiston Respublikasining «Sudlar to‘g‘risida»gi Qonuniga ko‘ra, Oliy sud raisi o‘rinbosarlari Prezident taqdimnomasiga binoan Oliy Majlis Senati tomonidan saylanadi.

Xalilillo Sobirjonovich To‘raxo‘jayev 1972 yil 21 yanvarda Namangan viloyati Yangiqo‘rg‘on tumanida tug‘ilgan. Ma'lumoti oliy, huquqshunos, 1-darajali adliya maslahatchisi. 

U 1997 yil Toshkent davlat yuridik institutini tamomlagan. Mehnat faoliyatini 1991 yilda Toshkent shahar Hamza tumani sudining kureri lavozimida ishlashdan boshlagan. 

1992-2008 yillar O‘zbekiston Respublikasi sud tizimida turli lavozimlarda mehnat qilgan.

2008-2014 yillarda O‘zbekiston Respublikasi prezidenti devoni huquqni muhofaza qiluvchi va nazorat idoralari faoliyatini muvofiqlashtirish bo‘yicha davlat maslahatchisi xizmatining adliya va sud idoralari faoliyati masalalari bo‘yicha yetakchi inspektori, Sud tizimi faoliyati masalalari bo‘yicha yetakchi inspektori, 2014-2017 yillarda Fuqarolik ishlari bo‘yicha Toshkent shahar sudining raisi, 2017 yil 12 apreldan 12 dekabr kuniga qadar O‘zbekiston Respublikasi prezidentining Fuqarolar huquqlarini himoya qilish, jismoniy va yuridik shaxslarning murojaatlari bilan ishlashni nazorat qilish va muvofiqlashtirish xizmati davlat maslahatchisining o‘rinbosari, birinchi o‘rinbosari lavozimlarida faoliyat ko‘rsatgan. 

Xalilillo To‘raxo‘jayev 2017 yildan 2020 yilgacha Adliya vazirligi huzuridagi Davlat xizmatlari agentligi direktori lavozimida ishlagan.

U 2020 yil iyunda O‘zbekiston prezidentining farmoni bilan Yer resurslari, geodeziya, kartografiya va davlat kadastri davlat qo‘mitasining raisi lavozimiga tayinlangandi.