Navoiyda mast piyoda avtohalokat qurboniga aylandi

Navoiy viloyati Navbahor tumanida mast holatdagi piyodani «Nexia» mashinasi urib ketdi. Bu haqda Kun.uz'ga viloyat IIB YHXB axborot xizmati xabar berdi.

Ma'lum qilinishicha, 15 mart kuni soat 20:30larda Navbahor tumani hududidan o‘tgan 4R-63 avtomobil yo‘lining 86-kilometrida 26 yoshli haydovchi «Nexia» mashinasini boshqarib kelayotib, to‘satdan yo‘lning belgilanmagan joyidan kesib o‘tgan 50 yoshli fuqaroni urib yuborgan. Fuqaro o‘ta mast holatda bo‘lgani aniqlangan.

Avtohalokat oqibatida piyoda hodisa joyida vafot etgan. Shuningdek, YTH sabablari o‘rganilganda yo‘lga tungi yoritish chiroqlari o‘rnatilmagani ma'lum bo‘lgan.

Hozirda holat yuzasidan tuman IIB tergov bo‘limi tomonidan Jinoyat kodeksining tegishli moddasi bilan jinoyat ishi qo‘zg‘atilib, tergov harakatlari olib borilmoqda.

Oldinroq Xatirchi tumanida 42 yoshli, Konimex tumanida 58 yoshli fuqaro avtohalokat tufayli vafot etgan edi.

#YTH #Navbahor tumani