Namanganda YPX inspektorini urib ketib, o‘limiga sababchi bo‘lgan haydovchi 6 yilga qamaldi

Namanganda YPX xodimini mashinada urib ketib, o‘limiga sabab bo‘lgan 24 yoshli haydovchi jinoiy jazoga tortildi. Bu haqda Hilqat TV telekanali xabar berdi. 

YTH 2025 yil 21 noyabr kuni tungi vaqtda Davlatobod tumanida sodir bo‘lgan. YPX xodimlari tomonidan Onix mashinasiga to‘xtash ishorasi berilgan. Biroq tegishli hujjatga ega bo‘lmagan haydovchi xodimlarga bo‘ysunmasdan qochishga uringan.

Shu vaqtda ratsiya orqali oldinroqda xizmat olib borayotgan katta serjant Vahobjon Mo‘minovga mazkur mashinani to‘xtatish chorasini ko‘rish yuzasidan xabar berilgan. Vahobjon Mo‘minov haydovchiga to‘xtash ishorasini bergan vaqtda haydovchi yuqori tezlik bilan xodimni urib yuborib, unga og‘ir tan jarohati yetkazgan.

Ko‘rilgan tezkor harakatlar natijasida transport vositasining harakati cheklanib, haydovchi qo‘lga olingan. Katta serjant Vahobjon Mo‘minov shifoxonaga olib borilgan vaqtda vafot etgan.

JIB Namangan shahar sudi hukmi bilan sudlanuvchi I.B. Jinoyat kodeksining 219-moddasi (hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) 2-qismi, 266-moddasi 2-qismi (transport vositalari harakati yoki ulardan foydalanish xavfsizligi qoidalarini buzish odam o‘lishiga sabab bo‘lishi) va 117-moddasi 2-qismida (xavf ostida qoldirish odam o‘lishiga sabab bo‘lishi) nazarda tutilgan jinoyatlarni sodir etganlikda aybdor deb topilgan. Unga 3 yil muddatga mashina boshqarish huquqidan mahrum qilgan holda 6 yil ozodlikdan mahrum etish jazosi tayinlangan.

Ikki qiz va bir o‘g‘ilning otasi bo‘lgan 42 yoshli Vahobjon Mo‘minov 2007 yildan ichki ishlar organlarida xizmat qilib kelgan.