Jalaquduqdagi xonadonlarda oq va adras tusli lolalar o‘stirilmoqda

Jalaquduq tumanidagi Yorqishloq mahallasini tom ma'noda Andijondagi Hollandiya deyish mumkin. Chunki, ushbu mahalladagi xonadonlarda turli navdagi lolalar yetishtiriladi.

{Yii::t(}

O'tkazib yuborish 6s

Mahallada 505 ta xonadon mavjud bo‘lib barchasida loladan hech bo‘lmaganda 10-15 tup ekiladi. 50dan ortiq xonadon esa gul yetishtirib daromad qiladi.

Uzum so‘ritoklari tagiga ekilgan lolalar ortiqcha parvarish talab qilmaydi. Shunchaki, 1-2 bora sug‘orib, begona o‘tlardan tozalab turish kifoya.

Ozodaxon aya Mamtaziyeva lolalarga o‘zgacha mehr qo‘ygan. Turmush o‘rtog‘i vafotidan so‘ng gullar uning ovunchog‘iga aylangan.

— Lolani yaxshi ko‘raman. 4 dona ko‘chatdan boshlaganman. Boshqa qo‘shmadim. O‘zi ko‘paydi. 8 yildan beri shug‘ullanaman shu ish bilan. Bu yil 2 million so‘mlik sotdim. Tomorqamizda 6 xil turdagi lolalar bor. Aniq sanog‘ini ham bilmayman lolalarni, – deydi Ozodaxon aya.

15 kun davomida ko‘zni quvnatib, dilni yayratib turuvchi lolalarni gul sotuvchilar o‘zlari olib ketishadi. Uzum ostida erta bahorda yetishtirilgan lolalar tug‘ilgan kun, bayramlar uchun ajoyib sovg‘a bo‘ladi.

Qiziq jihati, lolalar yetishtirib bo‘lingach urug‘lari salqin joyga olib qo‘yilib, o‘rniga boshqa mahsulotlar ekiladi. Erta bahordan esa urug‘lar qayta ekiladi.

— 10 milliondan ortiq daromad oldik, — deydi Abdug‘ofir Jalilov. — 10 ming tupdan ortiq lolalarimiz bor. Hozir faqat urug‘likka olib qo‘ydik. Qolganlarini sotib bo‘ldik. Nabiralar bilan birga parvarish qilamiz.