To‘qayev Qozog‘iston Tojikiston iqtisodiyotiga yordam berishga tayyorligini aytdi

Tojikiston poytaxtida Qozog‘iston va Tojikiston prezidentlari uchrashuvi bo‘lib o‘tdi.

Foto:akorda.kz

Qozog‘iston prezidenti Qosim-Jo‘mart To‘qayev va Tojikiston prezidenti Emomali Rahmon Dushanbeda ikki tomonlama uchrashuv o‘tkazdi, deb xabar bermoqda Tengrinews.kz.

Qayd etilishicha, uchrashuvda tomonlar savdo-iqtisodiy hamkorlikni mustahkamlash, investitsiyalar jalb etish, sanoat kooperatsiyasi, qishloq xo‘jaligi, tranzit-transport salohiyatini rivojlantirish masalalariga alohida e'tibor qaratdi.

Shuningdek, suv-energetika, harbiy-texnik va madaniy-gumanitar hamkorlik masalalari muhokama qilindi.

Qosim-Jo‘mart To‘qayev Qozog‘iston va Tojikiston o‘zaro savdo borasida yangi cho‘qqilarga chiqish uchun barcha imkoniyatlarga egaligini qayd etdi. U Qozog‘iston Tojikiston iqtisodiyotiga har qanday yordamni ko‘rsatishga tayyorligini ta'kidladi.

Muzokaralar yakunida ikki davlat o‘rtasida qator shartnoma va kelishuvlar imzolandi, deyiladi xabarda.

Tayyorlagan: Дилшод Аскаров

#Qozog‘iston #Tojikiston