Tehron Eronga qochib o‘tgan afg‘on harbiylarini Kobulga jo‘natdi 

“Tolibon” hujumi ortida Eronga qochib o‘tgan afg‘on harbiylari samolyotda Kobulga jo‘natildi. Bu haqda Tasnim axborot agentligi xabar berdi.

Bir qator afg‘on chegarachilari va bojxonachilari toliblar Eron bilan chegaradagi bir qator chegara o‘tish joylarini egallagandan keyin Eron chegara politsiyasi uchastkasiga yo‘l olgan.  

Ma'lum qilinishicha, afg‘on harbiylari Eronda joylashtirilishdan oldin ulardan qurol olib qo‘yilgan. So‘ngra ular Afg‘oniston hukumati talabi bilan Kobulga jo‘natilgan.

Avvalroq mingdan ortiq afg‘on harbiysi toliblar bilan janglardan so‘ng Tojikiston hududiga chekingani ma'lum qilingandi. Ilgari Tojikiston hududiga o‘tgan harbiylarni qo‘shib hisoblaganda, mamlakatdagi afg‘on harbiylari soni 1500ga yaqinlashdi.