Hindistonda MasterCard kartalarini chiqarish taqiqlab qo‘yildi

Hindistonda MasterCard xalqaro to‘lov tizimiga yangi debet kartalari chiqarish taqiqlab qo‘yildi. Hindiston markaziy banki kompaniya tranzaksiyalar haqidagi ma'lumotni mamlakat ichida saqlash talabini bajarmay, qonunchilikni buzgan deb topgan.

Foto: Getty Images

Ma'lum qilinishicha, taqiqlov to‘lov tizimining amaldagi mijozlariga ta'sir qilmaydi.

«Ko‘p vaqt o‘tgani va kompaniyaga yetarlicha imkoniyatlar berilganiga qaramay, MasterCard talablarni bajarmayotgani haqidagi xulosaga keldik», deb aytilgan markaziy bank xabarida.

AQShning to‘lov xizmatlari ko‘rsatuvchi provayderlari bunday qoidalarga qarshi chiqib keladi, chunki bu choralar xorijda biznes yuritish xarajatlarini oshiradi.

Joriy yilda Hindistonda yuqoridagi sabablarga ko‘ra American Express va Diners Club kartalarini chiqarish taqiqlab qo‘yilgandi.

Mastercard hissasiga 2020 yilda Hindistonda plastik kartalar yordamida amalga oshirilgan barcha to‘lovlarning 33 foizi to‘g‘ri kelgan.

Mastercard dunyoning eng qimmat brendlari o‘ntaligiga kiradi.