Siyosiy partiyalarga ommaviy tadbirlar o‘tkazishga ruxsat berildi

Bu haqda Respublika Maxsus komissiyasi tomonidan qaror qabul qilindi, deb ma'lum qildi Sog‘liqni saqlash vazirligi.

“Bunda siyosiy partiyalarga saylovchilar bilan uchrashuvlar o‘tkazishda ishtirokchilar o‘rtasida ijtimoiy masofani saqlash, tibbiy niqobda bo‘lish, antiseptik vositalardan foydalanishga rioya etish kabi sanitariya-gigiyena va karantin talablariga rioya etishga hamda uchrashuvlarga taklif etilayotgan fuqarolarning koronavirus infeksiyasiga qarshi emlanganligiga e'tibor qaratish tavsiya etildi”, – deyiladi xabarda.

Qayd etilishicha, Saylov kodeksiga muvofiq, O‘zbekiston Respublikasi prezidentligiga nomzodlarga va siyosiy partiyalarga saylovchilar bilan uchrashuvlar o‘tkazish orqali tashviqot olib borish huquqi ta'minlanadi. Saylovchilar bilan uchrashuvlar nomzodlar va siyosiy partiyalar tomonidan mustaqil ravishda o‘tkaziladi.

O‘zbekistonda saylovoldi kampaniyasiga 23 iyul kuni start berildi. Prezident saylovi 24 oktyabr kuni bo‘lib o‘tadi.