Meksikada birdaniga ikkita tabiiy ofat yuz berdi

Idalgo shtatida kuchli yomg‘ir yog‘ishi natijasida daryo toshib, bir nechta aholi maskani suv ostida qoldi. Shu bilan bir vaqtda Gerrero shtatida 7,1 balli zilzila sodir bo‘ldi.

Foto: AFP via Getty Images

Meksikaga birdaniga ikkita tabiiy ofat yopirildi. Mamlakatning markaziy qismi suv toshqinlari, janubi-g‘arbi esa zilzila oqibatlaridan aziyat chekmoqda.

Idalgo shtatida kuchli yomg‘ir yog‘ishi natijasida daryo toshib, bir nechta aholi maskani suv ostida qoldi. Suv toshqinlari oqibatida 2 mingdan ortiq uy shikastlandi. Mahalliy aholiga uylarini tark etish tavsiya qilinmoqda.

Xabar qilinishicha, 30 mingdan ortiq aholi zarar ko‘rgan, ikki kishi halok bo‘lgan.

Shu bilan bir vaqtda Gerrero shtatida 7,1 balli zilzila sodir bo‘ldi. Oqibatda 1,6 millionga yaqin kishi elektr ta'minotisiz qoldi.

Hozirda mutaxassislar zilzila oqibatlarini bartaraf etish bilan shug‘ullanmoqda.