Sirdaryoda dala maydonidan yoqib yuborilgan ayol jasadi topildi

Sirdaryo viloyati Mirzaobod tumanida dala maydonidan yoqib yuborilgan ayol jasadi topilgan. Bu haqda viloyat IIB xabar bermoqda.

Ma'lum qilinishicha, joriy yil 10 sentabr kuni soat 13:50 larda Mirzaobod tumani, Dehqonobod mahallasi hududidagi dala maydoni chetidagi jing‘il butalari orasidan ayol jinsiga mansub, yoqib yuborilgan holdagi jasad topilgan.

Mazkur holat yuzasidan huquqni muhofaza qiluvchi organ xodimlari tomonidan olib borilgan tezkor surishtiruv ishlari davomida, noma'lum murdaning shaxsiga aniqlik kiritilgan. Shuningdek, ushbu jinoyatni sodir qilgan shaxslar S.K, hamda uning jinoiy sheriklari L.K, S.M, V.D va J.Mlar ekanligi aniqlanib, ular ehtiyot chorasi sifatida qamoqqa olingan.

Qayd etilishicha, hozirda mazkur hodisa yuzasidan Mirzaobod tuman prokuraturasi tomonidan Jinoyat kodeksining 97-moddasi 2-qismi «j» bandi bilan jinoyat ishi qo‘zg‘atilib, tergov harakatlari olib borilmoqda.