Farg‘onada ichki ishlar xodimlari elektroshokerdan foydalanishni boshlaydi

Farg‘onada ichki ishlar organlari xodimlari 24 sentyabrdan elektroshokerdan foydalanishni boshlaydi. Bu haqda viloyat IIB axborot xizmati xabar qildi.

Qayd etilishicha, 24 sentyabrdan Farg‘ona viloyati ichki ishlar organlarining patrul-post, yo‘l harakati xavfsizligi va boshqa tegishli xizmatlari saf bo‘linmalari xodimlari xizmat jarayonida elektroshoker qurilmalaridan foydalanishni boshlaydi.

Bildirilishicha, qurilmadan foydalanishdan maqsad - IIO xodimlari yoki fuqarolar hayoti va sog‘lig‘iga shikast yetkazilishi oldini olish, huquqbuzarlar sog‘lig‘iga og‘ir va o‘ta og‘ir tan jarohati yetkazmagan holda zudlik bilan huquqbuzarlik va jinoyat harakatlarni cheklash.

Xodimlar elektroshoker qurilmasidan foydalanishdan avval maxsus tayyorgarlikdan o‘tkaziladi, ularga tegishli sertifikat beriladi.