Bolgariyadagi shaharda aholi ketib qolishini to‘xtatish uchun bepul yer beriladi

Bolgariyaning Svilengrad shahrida aholi ketib qolishini to‘xtatish maqsadida uy qurish uchun bo‘sh uchastkalar bepul beriladi. Bu haqda TheMayor.EU portali xabar qildi.

Hozirda Bolgariya aholisi soni boshqa mamlakatlarnikiga nisbatan tez kamaymoqda. Svilengrad shahrida XXI asr boshida 19 mingdan ortiq kishi yashagan bo‘lsa, hozirda 16 ming atrofida aholi istiqomat qiladi.

Shu bois yangi dastur yosh oilalar va boshlovchi mutaxassislar uchun mo‘ljallangan. Mahalliy hokimiyat shu yo‘l bilan aholi ketib qolishi muammosini hal qilmoqchi, deb yozadi portal.

Qayd etilishicha, noqulay sharoitda yashayotganlar va shaxsiy uy-joyga ega bo‘lmaganlar bepul yer olishi mumkin.

Qurilish uchun maydondan tashqari, barcha zarur ruxsatnomalar va tasdiqlangan arxitektura rejasidan iborat hujjatlar ham taqdim etiladi.

Dasturning birinchi bosqichida sakkizta uchastkani berish rejalashtirilgan. Agar tashabbus muvaffaqiyatli amalga oshsa, kelgusida dastur yanada kengaytiriladi.