Toshkentdagi qurilish maydonchasida ikkita artilleriya snaryadi topildi

Yakkasaroy tumanidagi qurilishda o‘quv mashg‘ulotlariga mo‘ljallangan o‘q-dorilar topildi.

Foto: IIBB axborot xizmati

Ijtimoiy tarmoqlarda qurilayotgan obektda ikkita artilleriya snaryadi topilgani to‘g‘risidagi video tarqaldi. Toshkent shahar IIBB mazkur holat yuzasidan rasmiy ma’lumot berdi.

Qayd etilishicha, 2021 yil 27 dekabr kuni 102 raqamiga Qashqadaryo viloyatida tug‘ilgan, 26 yoshli fuqaro Sh.T.dan xabar kelib tushgan. Uning gapiga ko‘ra, tanishi, 29 yoshli A.M. bilan birgalikda Yakkasaroy tumanida qurilayotgan obekt hududida shubhali, artilleriya aslahalariga o‘xshash zanglagan buyumlar topgan. U tezkor xizmatlarga xabar bergan.

Ko‘rsatilgan manzilga Toshkent shahar IIBB xodimlari IIVning maxsus mutaxassislari bilan birgalikda yetib borgan. Tekshiruv o‘tkazilgach, topilgan buyumlar o‘quv mashg‘ulotlari davomida foydalanishga mo‘ljallangan ikkita 115 millimetrlik o‘quv snaryadi va ikkita 82 millimetrlik o‘quv minomyoti ekani ma’lum bo‘lgan.

Mazkur holat bo‘yicha o‘rganish ishlari davom etmoqda, deyiladi xabarda.