Kuchli shamol Samarqand shahridagi ko‘p qavatli uyning tomini uchirib yubordi

Ijtimoiy tarmoqlarda kuchli shamol Samarqand shahridagi ko‘p qavatli uyning tomini uchirib ketgani tasvirlangan videolar tarqaldi. Viloyat IIB holat bo‘yicha ma’lumot berdi.

Viloyat IIB axborot xizmatining ma’lum qilishicha, hodisa 2022 yil 16 yanvar kuni soat 03:22 larda sodir bo‘lgan. Kuchli esgan shamol Samarqand shahar Gagarin ko‘chasida joylashgan 36-uy tomining bir qismini uchirib ketgan. Tomning tunuka, yog‘och bo‘laklari ko‘chaga tushgan.

Qayd etilishicha, sodir bo‘lgan hodisa oqibatida hech kim jabrlanmagan.

Ma’lumot uchun, viloyat Gidrometeorologiya xizmatining ma’lumotiga ko‘ra, 2022 yil 16 yanvar kuni soat 03:17 larda Samarqand shahrida sekundiga 15 metr tezlikda shamol esgan.