O‘zbekiston va Qozog‘iston parlamentlararo hamkorlik kengashini tashkil etish to‘g‘risidagi bitimni imzoladi, deb xabar bermoqda «Xabar 24».
Kengash ikki davlat rahbarlari o‘rtasidagi kelishuvlarga muvofiq tashkil etilgan. Qozog‘iston Majlisi raisi Yerlan Koshanov bu qo‘shni davlatlar parlamentlari o‘rtasidagi, jumladan, qonunchilik darajasidagi o‘zaro hamkorlikka yangi sur’at bag‘ishlashini ta’kidladi.
U respublikalar o‘rtasida o‘tgan 30 yildan ortiq davrdagi diplomatik munosabatlar barcha sohalarda hamkorlikni rivojlantirish uchun mustahkam poydevor yaratganini ta’kidladi. O‘z navbatida, O‘zbekiston Qonunchilik palatasi spikeri Nurdinjon Ismoilov qozoq-o‘zbek integratsiya aloqalarini rivojlantirish va mustahkamlashga qo‘shgan hissasiga berilgan yuksak baho uchun minnatdorlik bildirdi.
«Parlamentlararo hamkorlik kengashining tashkil etilishi barcha kelishuvlarni amalga oshirishda: savdo-iqtisodiy, madaniy-gumanitar va boshqa sohalarda parlamentlararo hamkorlik samaradorligini oshiradi. Ishonamanki, O‘zbekiston Qonunchilik palatasi spikerining ushbu tashrifi qardosh mamlakatlarimiz o‘rtasidagi strategik sheriklikni yanada mustahkamlash va rivojlantirishga xizmat qiladi», – dedi Koshanov.
Avvalroq, Nurdinjon Ismoilov Qozog‘iston prezidenti bilan uchrashgani xabar qilingandi.
Qosim-Jo‘mart To‘qayev Qonunchilik palatasi raisi Nurdinjon Ismoilovni qutlab, mamlakatlar mustahkam do‘stlik va yaxshi qo‘shnichilik rishtalari, umumiy madaniy qadriyatlarga tayangan holda, davlatlararo sheriklik namunasi bo‘lgan mustahkam va uyg‘un munosabatlar o‘rnatganini ta’kidladi.
