Zelenskiy Putinga uchrashishni taklif qildi

Zelenskiyning so‘zlariga ko‘ra, Ukraina urushni tugatish uchun istalgan shaklda va istalgan joyda muzokara o‘tkazishga tayyor.

Foto: president.gov.ua

Ukraina prezidenti Vladimir Zelenskiy Rossiya prezidenti Vladimir Putinga uchrashishni taklif qildi. U bu taklifni Myunxendagi xavfsizlik bo‘yicha konferensiyada bildirdi.

"Men Rossiya prezidenti nima xohlayotganini bilmayman, shuning uchun uchrashishni taklif qilaman", – dedi Zelenskiy.

U shuningdek, Ukraina urushni tugatish uchun istalgan shaklda va istalgan joyda muzokara o‘tkazishga tayyorligini aytdi.

"Parij, Berlin, Minsk, Istanbul, Jyeneva, Bryussel, Nyu-York yoki Pekin – menga Ukrainada tinchlik o‘rnatish bo‘yicha dunyoning qaysi nuqtasida kelishishning farqi yo‘q. To‘rtta, yettita yoki yuzta mamlakat ishtirok etishi ham ahamiyatsiz – asosiysi, ular orasida Ukraina va Rossiya bo‘lishi kerak", – dedi Ukraina rahbari.

Uning so‘zlariga ko‘ra, tinchlik nafaqat Ukraina, balki butun dunyoga kerak.

"Hech kim Ukrainani G‘arb va Rossiya o‘rtasidagi qulay va "abadiy" bufer deb o‘ylamaydi degan umiddaman. Bu hech qachon bo‘lmaydi, bunga hech kim yo‘l qo‘ymaydi", – dedi Zelenskiy.

Avvalroq Ukraina prezidenti jurnalistlar bilan suhbat davomida Vladimir Putin bilan “istalgan shaklda” uchrashishga tayyorligini aytgandi.