Ukrainadagi urush. Oltinchi kun suratlari

Urushning oltinchi kuniga kelib Rossiya armiyasi Xarkov va Kiyevni artilleriyadan o‘qqa tutishni kuchaytirdi. Ukraina tomoni tinch aholi orasida o‘nlab qurbonlarni qayd etdi. Rossiyalik harbiylar Kiyevni o‘rab olishda davom etmoqda, shahar ko‘chalarida barrikadalar qurilgan va mudofaaga tayyorgarlik ko‘rilmoqda. Vladimir Zelenskiy Ukrainaning Yevropa Ittifoqiga «yangi maxsus tartib» asosida «zudlik bilan» qabul qilinishi bo‘yicha ariza topshirgan, YeIning sakkiz mamlakati rahbarlari Ukrainaga nomzod mamlakat maqomi berishga chaqirgan. Quyidagi materialda urushning oltinchi kunidagi vaziyatni ifoda etuvchi suratlar.

So‘nggi soatlarning asosiy voqealari:

• Bayden Amerika qo‘shinlari Ukrainada jang qilmasligini, biroq Yevropadagi NATO ittifoqchilarini himoya qilishini aytdi;
• AQSh havo hududini Rossiyadan kelayotgan samolyotlar uchun yopdi;
• ExxonMobil kompaniyasi «Saxalin-1» loyihasidan chiqishni boshladi;
• Boeing Rossiya aviakompaniyalariga texnik xizmat ko‘rsatish va qo‘llab-quvvatlashni to‘xtatdi;
• Kanada Dmitriy Medvedev, Sergey Sobyanin, Aleksandr Beglov va boshqa bir qator yuqori martabali rossiyaliklarga nisbatan sanksiyalar kiritdi;
• Mordoviya rahbari Artem Zdunov Ukrainada vafot etgan polkovnik Viktor Isaykin haqida ma’lum qildi;
• Ford Rossiyadagi faoliyatini to‘xtatganini e’lon qildi;
• 160 dan ortiq Nobel mukofoti laureati Ukrainaga bosqinni to‘xtatish talabi bilan ochiq xat imzoladi.