Zelenskiy: Rossiya tinchlikni istamasligini har kuni ko‘rsatmoqda

«Terrorchi davlat tinchlikni xohlaydimi? Aftidan, yo‘q. U buni har kuni ko‘rsatmoqda. Zaporijjya - Rossiya raketa terrorini yo‘naltirayotgan Ukraina shaharlaridan biri. Zaporijjyada Rossiyaning oddiy turar joy binolariga bergan zarbalari natijasida bugun tunda kamida 14 kishi halok bo‘ldi», dedi siyosatchi. 

Uning so‘zlariga ko‘ra, agar Kreml haqiqatan ham muzokaralar yo‘liga kirishni istasa, bunday zarbalarni uyushtirmasdi.

Ukraina harbiylari 9 oktyabrga o‘tar kechasi Ryazandagi aerodromdan oltita Tu-22M3 bombardimonchi samolyoti, Rostov oblastidagi Marinovka aerodromidan yettita Su-35 samolyoti havoga ko‘tarilganini aniqlagan.

Ukrain harbiylariga ko‘ra, bu samolyotlar Melitopol va Berdyansk hududlaridan turib Zaporijjyaga zarbalar yo‘llagan.

Xususan, Ukraina havo kuchlariga ko‘ra, Tu-22M3 bombardimonchilaridan to‘rtta X-22 qanotli raketalari, Su-35 samolyotlaridan esa ikkita boshqariluvchi X-59 aviatsiya raketalari uchirilgan.

Bundan tashqari, rossiyaliklar S-300 zenit-raketa majmualari orqali ham raketalar uchirgan.