Zelenskiy: Xerson tashlab ketilgan minalar tufayli xavfliligicha qolmoqda

«Afsuski, minalardan tozalash vaqtida sapyorlarimizdan biri halok bo‘ldi, yana to‘rt nafari yaralandi. Men Xersonning barcha aholisidan ehtiyot bo‘lishni va barcha xavfli narsalar haqida zudlik bilan qutqaruvchilarga xabar berishni so‘rayman», - dedi Zelenskiy.

Ukraina rahbari mintaqada qo‘poruvchi guruhlarni, shuningdek, rossiyalik askar va yollanma askarlarni qidirish davom etayotganini ta’kidladi.

Bundan oldin Ukraina Xerson ustidan nazoratni qaytarib olganini e’lon qilgandi. 

«Xerson Ukraina nazorati ostiga qaytmoqda, Ukraina Qurolli kuchlari bo‘linmalari shaharga kirib bormoqda», — deya ma’lum qildi 11 noyabr kuni mamlakat mudofaa vazirligining Bosh razvedka boshqarmasi (BRB).

Shu bilan birga, Mudofaa vazirligi «Rossiya armiyasi qo‘mondonligi tomonidan Xersonda tashlab ketilgan rossiyalik harbiy xizmatchilarga murojaat» bilan chiqdi. «Qo‘mondonlaringiz sizni fuqarolik kiyimiga o‘tishga va Xersondan qochishga harakat qilishga undamoqda. Muvaffaqiyatga erisha olmaysiz», deyiladi hujjatda, shuningdek, ruslarning chekinish yo‘llari Ukraina Qurolli kuchlari nazorati ostida ekanligi ham ta’kidlangan.

Shaharda qolgan rus harbiy xizmatchilari ularga xavfsizlik, hayot va keyinchalik almashish imkoniyatini va’da qilib, taslim bo‘lishga chaqirildi. «Ukraina Qurolli kuchlariga qarshilik ko‘rsatishga qaratilgan har qanday urinishlar to‘xtatiladi. Qarshilik ko‘rsatgan har bir rossiyalik harbiy yo‘q qilinadi. Sizda o‘limdan qochish uchun yagona imkoniyat bor - darhol taslim bo‘lish», - deyiladi Ukraina Mudofaa vazirligi bayonotida. Ruslarga Jyeneva konvensiyalariga rioya qilish, shuningdek, oziq-ovqat va tibbiy yordam ko‘rsatish kafolatlangan.