Akademik Abdumavlon Abdullayev vafot etdi

Genetika va o‘simliklar eksperimental biologiyasi sohasida dunyoga tanilgan olim, O‘zbekiston Fanlar akademiyasi akademigi Abdumavlon Abdullayev 2022 yil 8 dekabr kuni 92 yoshida vafot etdi. 

Abdumavlon Abdullayev 1930 yilda Namangan viloyatida tug‘ilgan. O‘zbekiston Fanlar akademiyasi Genetika va o‘simliklar eksperimental biologiyasi instituti bosh ilmiy xodimi lavozimida ishlab kelgan.

U 1961 yilda nomzodlik, 1972 yilda doktorlik dissertatsiyasini yoqlagan. 1979 yilda O‘zR FA muxbir a’zosi etib saylangan.

1980 yilda «O‘zbekistonda xizmat ko‘rsatgan fan arbobi» unvoni bilan taqdirlangan. 1984 yilda esa «Genetika» sohasi bo‘yicha professor unvoni berilgan. 1995 yilda u «Molekulyar genetika» sohasi bo‘yicha O‘zR FA akademigi etib saylangan. 

Akademik A.Abdullayev asosiy ilmiy yo‘nalishi g‘o‘za genetikasi, sistematikasi, evolyutsiyasi va filogeniyasi kabi fundamental muammolarini o‘rganishga qaratilgan. 

Shu bilan birga, jahondagi eng boy kolleksiyalaridan biri — g‘o‘za genofondining yaratilishida, uni yangi namunalar bilan to‘ldirishda  A.Abdullayevning hissasi beqiyos.