Termiz xalqaro aeroporti rekonstruksiyadan so‘ng ishga tushirildi

26 dekabr kuni Termiz xalqaro aeroporti birinchi reysni qabul qildi. Uzbekistan Airways aviakompaniyasining Toshkent - Termiz yo‘nalishi bo‘yicha HY-65 reysi, bortida 146 nafar yo‘lovchilar bilan, soat 08:15 da Termiz aeroportiga kelib qo‘ndi.

Foto: Uzbekistan Airpors

55 kunlik tanaffusdan so‘ng Termiz xalqaro aeroporti samolyotlarni qabul qilish va jo‘natish uchun yana ochildi. Qayta qurish doirasida uzunligi 3000 metr va eni 60 metr bo‘lgan yangi uchish-qo‘nish yo‘lagi, yurish yo‘laklari va uchta samolyot to‘xtash joyi uchun perronni o‘z ichiga olgan, yangi 4E toifali aerodrom majmuasi qurildi.

Shuningdek, aerodromga zamonaviy CAT-I ICAO yoritish uskunalari tizimi, meteorologik va radionavigatsiya qo‘nish tizimlari o‘rnatildi. Yangi aerodrom majmuasini qurish loyihasi 550 milliard so‘mga baholanmoqda. Ayni paytda 377 milliard so‘mlik ishlar bajarilgan. Loyihaning yakuniy bosqichi — uchta samolyot turar joyi va ikkinchi yurish yo‘lagi 2023 yilning apreligacha yakunlanishi rejalashtirilmoqda.

Termizdagi yangi aerodromning uchish-qo‘nish yo‘lagi betondan qurilgan. Bu Surxondaryo viloyatining issiq iqlimi sharoitida eng yaxshi yechim — betondan yasalgan uchish-qo‘nish yo‘lagi mustahkamroq va chidamliroq. Bugungi kunga qadar faqat Navoiy va Termiz aeroportlarida betondan uchish-qo‘nish yo‘lagi qurilgan.

Termiz aeroporti yangi aerodrom majmuasini foydalanishga topshirishga tayyorgarlik ko‘rilayotgani munosabati bilan 1 noyabr kuni yopilgan va parvozlar vaqtincha respublikaning boshqa xalqaro aeroportlariga yo‘naltirilib kelingan edi. Aeroport terminali ham rekonstruksiya qilinib, 2019 yilda foydalanishga topshirilgan.