Fransiya Ukrainani 200 million yevroga qurol-yarog‘ bilan ta’minlaydi

Parij Ukrainaga to‘g‘ridan to‘g‘ri fransuz ishlab chiqaruvchilaridan qurol va harbiy texnika sotib olish imkonini beruvchi 200 million yevrolik fond yaratmoqda.

Foto: AP

Bu haqda Fransiya qurolli kuchlari vaziri Sebasten Lekornyu Kiyev shahrida Ukraina mudofaa vaziri Oleksiy Reznikov bilan qo‘shma matbuot anjumanida ma’lum qildi.

Ukraina poytaxtiga kelgan Lekornyu Reznikov va Zelenskiy bilan uchrashdi.

U Fransiya Ukrainaga urush boshlanganidan beri ko‘rsatayotgan «ishonchli va doimiy yordam» haqida gapirdi.

«Biz Ukraina armiyasining ushbu yordamni 2023 yilda davom ettirishga bo‘lgan ehtiyojini o‘rganib chiqdik», deb yozdi Fransiya vaziri Twitter'da.