Qirg‘iziston prezidenti soliq deklaratsiyasi e’lon qilindi

Qirg‘iziston Soliq xizmati mansabdor shaxslarning 2021 yil yakuni bo‘yicha daromadlari to‘g‘risidagi deklaratsiyalarini e’lon qilishni boshladi. Jumladan, mamlakat prezidenti Sadir Japarovning daromadlari va mol-mulkiga oid ma’lumotlar ham taqdim etildi.

Sadir Japarov 2021 yilda daromadi 997 803 qirg‘iz so‘mini (taxminan $11500) tashkil qilganini ko‘rsatgan. Bu prezidentning oylik daromadi 83,1 ming qirg‘iz so‘miga (taxminan $930) teng bo‘lganini anglatadi.

Hujjatga ko‘ra, unda qishloq xo‘jaligiga mo‘ljallangan 0,6 gektar yer uchastkasi va garaj bor.

Ko‘chmas mulk yoki transport vositasi haqida ma’lumot berilmagan. Shuningdek, davlat rahbarining eng yaqin qarindoshlari daromadlari va mol-mulki haqida ham ma’lumot yo‘q.

Sadir Japarov 2020 yil uchun deklaratsiyada qarindoshlariga tegishli 50,7 kv.m. va 389 kv.m. maydonga ega ikkita uy, shuningdek, 17,2 kv.m. garaj borligini ko‘rsatgan edi. Qolaversa, ular «Umut bulagi» jamoat fondining ta’sischilari bo‘lgan.