Rossiyalik deputat AQSh Moskvaga zarba bermoqchi ekanini aytdi 

«Men ular zarba rejasini ishlab chiqayotganini bilaman, masalan, «Moskva-Siti»ga namoyishkorona zarba berishni. Ya’ni ular qarama-qarshilik darajasini oshirmoqchi», dedi Fyodorov. 

Deputatning fikricha, Rossiyaning markaziy hududlariga zarbalar ko‘payadi. Fyodorov Engels shahridagi aerodromga qilingan hujumni misol qilib keltirdi. Uning oqibatida uch kishi halok bo‘lgan edi. 

Dekabr oyi boshida AQSh Davlat kotibi Entoni Blinken Vashington Kiyevning Rossiya Federatsiyasi hududiga zarba berishga urinishlarini rag‘batlantirmasligini aytdi. U, shuningdek, AQSh bu borada Ukrainaga yordam bermasligini ta’kidladi. Blinkenning qo‘shimcha qilishicha, u Rossiya aerodromlariga hujumlar haqida eshitgan, biroq u bu haqda «batafsil ma’lumotga» ega emas. 

Shu bilan birga, harbiy xavfsizlik va qurol nazorati bo‘yicha Venada bo‘lib o‘tgan muzokaralarda Rossiya delegatsiyasi rahbari Konstantin Gavrilovning aytishicha, ukrainalik harbiylar Rossiyaning ikkita aerodromiga hujum qilishda qo‘llagan dronlar AQSh ishtirokida takomillashtirilgan. Gavrilov, shuningdek, NATO Ukrainaning Rossiya aerodromlariga hujum tayyorlayotganidan xabardor ekanini aytdi.