Xavflilik darajasi yuqori bo‘lgan mahsulotlar majburiy davlat ro‘yxatidan o‘tkaziladi

Vazirlar Mahkamasining “Mahsulotlarning muvofiqligini baholash tartiblariga oid nizomlarni tasdiqlash to‘g‘risida”gi qarori loyihasi e’lon qilindi.

Hukumat qarori loyihasi bilan:

a) xavflilik darajasi yuqori bo‘lgan mahsulotlarni majburiy davlat ro‘yxatidan o‘tkazish tartibi to‘g‘risidagi nizom tasdiqlanadi. Unda quyidagilar nazarda tutilgan:

• majburiy tartibda davlat ro‘yxatidan o‘tkaziladigan mahsulotlar turlari ro‘yxati;
• davlat ro‘yxatidan o‘tkazilgan mahsulotlar davlat reyestrini yuritish;
• davlat ro‘yxatidan o‘tkazilgan mahsulotlarning daliliy hujjatlarini shakllantirish va saqlash;
• davlat ro‘yxatiga olinganlik to‘g‘risidagi guvohnomaga o‘zgartirish kiritish, uni amal qilishini to‘xtatib turish yoki tugatish tartibi;

b) mahsulotlarni sertifikatlashtirish tartibi to‘g‘risidagi nizom tasdiqlanadi. Unda quyidagilar nazarda tutilgan:

• majburiy tartibda sertifikatlanadigan mahsulotlar turlari ro‘yxati;
• mahsulotlarni intellektual mulk obektlariga bo‘lgan huquqlarni o‘rganish va tekshirish;
• sertifikatlashtirishni amalga oshirish tartibi;
• mahsulotlarni sertifikatlashtirish sxemalari qo‘llanishi;
• sertifikatlashtirilgan mahsulotlarni davriy baholash;
• muvofiqlik sertifikatiga o‘zgartirish kiritish tartibi;

v) xavflilik darajasi yuqori bo‘lmagan mahsulotlarning muvofiqligini deklaratsiyalash yo‘li bilan tasdiqlash tartibi to‘g‘risidagi nizom tasdiqlanadi. Unda quyidagilar nazarda tutilgan:

• xavflilik darajasi yuqori bo‘lmagan majburiy muvofiqligi deklaratsiyalanadigan mahsulotlar ro‘yxati;
• muvofiqlikni deklaratsiyalash sxemalari;
• muvofiqlikni deklaratsiyalash hujjatlarni shakllantirish va uni ro‘yxatga olish;
• muvofiqlik deklaratsiyasini ro‘yxatga olishga asos bo‘lgan daliliy hujjatlarni shakllantirish va saqlash;

g) xavflilik darajasi yuqori bo‘lmagan mahsulotlarning muvofiqligini ma’lum qilish yo‘li bilan tasdiqlash tartibi to‘g‘risidagi nizom tasdiqlanadi. Unda quyidagilar nazarda tutilgan:

• xavflilik darajasi yuqori bo‘lmagan majburiy muvofiqligi ma’lum qilinadigan mahsulotlar ro‘yxati;
• muvofiqlik xabarnomasini ro‘yxatga olish, uning amal qilishini to‘xtatib turish yoki tugatish;

d) mahsulotlarni texnik jihatdan tartibga solish sohasidagi normativ hujjatlar va boshqa normativ-huquqiy hujjatlar talablariga nomuvofiqligini aniqlash, ularning ro‘yxatini yuritish, erkin muomaladan chiqarish va yo‘q qilish tartibi to‘g‘risidagi nizom tasdiqlanadi. Unda quyidagilar nazarda tutilgan:

• texnik jihatdan tartibga solish sohasidagi normativ hujjatlar va boshqa normativ-huquqiy hujjatlar talablariga mahsulotlarni nomuvofiqligini aniqlash tartibi;
• nomuvofiq deb topilgan mahsulotlarni savdodan chaqirib olish, yo‘q qilish hamda ularning ro‘yxatini yuritish tartibi;
• mahsulotlarni olib kirishni qayta tiklash tartibi.