Isroil elchisi: Kiyevga ma’lum bo‘lganidan ko‘proq yordam beryapmiz

Isroil Rossiyaga qarshi urushda Ukrainani jamoatchilik bilganidan ko‘ra kengroq miqyosda qo‘llab-quvvatlamoqda. Bu haqda Isroilning Germaniyadagi elchisi Ron Prosor 28 yanvar, shanba kuni chop etilgan Funke Mediengruppe nashriga bergan intervyusida aytib o‘tdi. Isroil Ukrainaga yordam bermoqda, «lekin parda ortida va ma’lum bo‘lganidan ham ko‘proq», dedi diplomat.

U ushbu masala bo‘yicha o‘z mamlakati tutgan vazmin pozitsiyani tushunishga chaqirdi. «Suriyada rossiyaliklar bor. Ma’lumki, Isroil armiyasi Erondan Suriya va Livanga qurol-yarog‘ yetkazib berishni muntazam ravishda to‘xtatib qoladi. Ular orasida Eronning uchuvchisiz uchoqlari va Rossiya Ukrainada qo‘llayotgan raketalari ham bor», — dedi Prosor.

Isroil jim harakat qilishga majbur bo‘layotgan ikkinchi holatga to‘xtalib, u Rossiyada katta yahudiylar jamoasining mavjudligini aytdi.

Isroil rasmiylari Rossiyaning Ukrainadagi urushini bir necha bor va so‘zsiz qoralagan, 19 yanvar kuni yangi tashqi ishlar vaziri Eli Koen Kiyevni gumanitar yordam ko‘rsatishda davom etishiga ishontirgan edi. Ammo, umuman olganda, Isroil hali ham vazmin pozitsiyani egallab, Ukrainaga qurol-yarog‘ yetkazib berishni qat’iyan rad etyapti, deya ta’kidlaydi dpa agentligi.