Volodimir Zelenskiy bugun Londonga boradi

U Buyuk Britaniyada tayyorgarlikdan o‘tayotgan ukrainalik harbiylar bilan uchrashishi rejalashtirilgan, deya xabar berdi AP agentligi Dauning-stritga tayanib. 

Shuningdek, Britaniya ommaviy axborot vositalarida Volodimir Zelenskiyning Buyuk Britaniya Mudofaa vazirligi rahbari Ben Uolles bilan uchrashishi haqida xabarlar paydo bo‘ldi.

Prezident, shuningdek, Britaniya mudofaa va xavfsizlik rasmiylari bilan uchrashib, ukrainalik jangchilarni tayyorlash kengaytirilgan dasturi tafsilotlarini muhokama qiladi.

Bundan tashqari, bosh vazir Rishi Sunak Buyuk Britaniyaning Ukrainani uzoq masofali qurollar bilan ta’minlashga tayyorligini ma’lum qilishi mumkin.

Zelenskiy Britaniya parlamentida ham nutq so‘zlashi kutilyapti. Bu haqda jurnalist Patrik Vintur Twitter’da ma’lum qildi. Unga ko‘ra, Zelenskiy nutqidan so‘ng London Rossiyaga qarshi yangi sanksiyalarni e’lon qiladi.

«Yevropa kengashi sammiti oldidan Volodimir Zelenskiy Britaniya parlamentiga murojaat qiladi, keyin Britaniya sanksiyalarni e’lon qiladi, jumladan, Kremlning urush mashinasidan foyda olayotgan kompaniyalarga qarshi sanksiyalar nazarda tutilgan», deb yozdi u.

Shu bilan birga, Dauning-strit Ukraina harbiylarini tayyorlash dasturini kengaytirish rejalari haqida ma’lum qildi.