Baxmutdagi janglar va yerto‘lada yashayotgan donbassliklar. Urush suratlari

Ukrainada urushning 350-kuni o‘tdi. Asosiy ma’lumotlar:

• Volodimir Zelenskiy Buyuk Britaniyaga tashrif buyurdi. Bu yerda u bosh vazir Rishi Sunak hamda qirol Charlz III bilan uchrashdi, shuningdek Britaniya parlamentida nutq so‘zladi. Rishi Sunak Kiyevga harbiy yordam yetkazib berishni tezlashtirishga va’da qildi. Jumladan, Challenger 2 tanklari Ukrainaga mart oyidayoq yetib borishi ma’lum qilindi.
• Buyuk Britaniyaga tashrifidan keyin Ukraina prezidenti Parijga kelib, bu yerda fransuzlar prezidenti Emmanuel Makron hamda Berlindan uchib kelgan Germaniya kansleri Olaf  Shols bilan uchrashdi.
• Buyuk Britaniya Rossiyaga qarshi yangi sanksiyalar e’lon qildi. Ro‘yxatga Putinning kichik qizi ekani aytiladigan Svetlana Krivonogixning onasi hamda Rossiya prezidentining «raqamli kooperativi» ham o‘rin olgan.
• Ukraina urush boshlangach Rossiyaga majburan olib ketilgan sakkiz mingdan oshiq boladan 128 nafarini qaytardi.
• Rossiya koloniyalarida «Vagner» xususiy harbiy kompaniya safiga yollanib, Ukrainadagi urushga borishdan bosh tortgan mahbuslarga yangi jinoiy ishlar ochish bilan tahdid qilinmoqda. Shuningdek tergov izolyatorlarida hibsga olinganlarni ham urushga yuborishga harakat qilishmoqda — buning evaziga ularga jinoiy ishlarni yopish va’da qilinmoqda. Shu bilan birga Yevgeniy Prigojin xususiy harbiy kompaniya mahbuslarni urushga jalb etishni to‘xtatgani haqida ma’lum qildi.
• Rossiya armiyasi to‘g‘risida «feyk» tarqatishda ayblanib, tergov izolyatorida saqlanayotgan Vladimir Kara-Murzaning hibsdagi muddati 12 martga qadar uzaytirildi.

Baxmut janglar vaqtida

Ukrainalik harbiylar 2022 yil iyulidan buyon Baxmutni mudofaa qilishmoqda. Volodimir Zelenskiy fransuzlarning Le Figaro nashriga bergan intervyusida, Ukraina qurolli kuchlari G‘arbdagi ittifoqchilardan qurollar kelmaguncha «dosh berib turishi kerakligi»ni aytdi. Ukraina prezidenti Baxmut katta strategik ahamiyatga ega emasligi, 2023 yil fevraliga kelib Rossiya qo‘shini shaharni to‘liq vayron etganini qo‘shimcha qildi. «Ammo agar ular Baxmutni olishsa, yana oldinga yurishni istashadi. Bu ularga ustunlik beradi. Masala shundaki, Baxmutdan keyin nima bo‘ladi», — deya qayd etgan Zelenskiy.

Avdiyivkadagi hayot

Avdiyivka shahri Donetsk oblastining markaziy qismida joylashgan bo‘lib, istilo ostidagi Donetsk bilan qo‘shni shahar hisoblanadi. Bu shahar Ukraina armiyasi nazoratida qolgan. Ukraina qurolli kuchlari Bosh shtabidan ma’lum qilishlaricha, Rossiya qo‘shini shaharni muntazam ravishda o‘qqa tutmoqda va Avdiyivka yo‘nalishida hujumga o‘tishga tayyorlanmoqda. Oblast harbiy ma’muriyati rahbari Pavel Kirilenkoning so‘zlariga ko‘ra, shahar «amalda yer bilan yakson qilingan», ammo «to‘qqizinchi oydirki Ukraina qo‘shinlarining Donetsk oblastidagi qal’asi» bo‘lib qolmoqda.

Kiyevda Chkalovning haykali buzib tashlanishi 

Mariupoldagi rossiyalik sapyorlar