Dauletmurat Tajimuratovning advokati Oliy sudga apellyatsiya shikoyatini berdi 

2022 yil iyul oyida Qoraqalpog‘istonda yuz bergan tartibsizliklar bo‘yicha jinoiy ishda sudlangan Dauletmurat Tajimuratovning ukasi va advokati Rinat Tajimuratov Oliy sudga apellyatsiya shikoyatini berdi. Gazeta.uz xabariga ko‘ra, u jazoni yengilrog‘iga almashtirish va moddiy zararni to‘lashdan ozod qilishni so‘ragan. 

2023 yil 31 yanvar kuni birinchi instansiya sudi Dauletmurat Tajimuratovni hokimiyatni egallab olish yoki konstitutsiyaviy tuzumni ag‘darish uchun fitna uyushtirishda, o‘ta yirik miqdorda o‘zlashtirishda, jinoiy faoliyatdan olingan daromadlarni qonuniylashtirishda, shaxsga nisbatan zo‘ravonlik, talon-toroj qilish, o‘t qo‘yish, zarar yetkazish yoki mulkni yo‘q qilish, hokimiyat vakiliga qurol yoki qurol sifatida qo‘llanadigan boshqa narsalarni qo‘llash yoki ishlatish tahdidi bilan qarshilik ko‘rsatish, shuningdek, ommaviy tartibsizlik va boshqa jinoyatlarda faol ishtirok etishda aybdor deb topib, 16 yilga ozodlikdan mahrum qilgan edi. 

Rinat Tajimuratov akasining advokati sifatida Oliy sudga birinchi instansiya sudining qarori ustidan shikoyat qilgan. U akasiga qo‘yilgan ko‘plab ayblovlar bo‘yicha jinoyat alomatlari yo‘qligini yoki dastlabki tergovda tasdig‘ini topmaganini ma’lum qilgan. 

Shuningdek, Dauletmurat Tajimuratovning oilaviy ahvoli va 3 nafar farzandi borligi, aholiga ko‘rsatgan yordamini (chekka qishloqlarni gazlashtirish, kam ta’minlanganlarga bepul advokatlik xizmatlar ko‘rsatish, bolalar uyiga homiylik qilish, davlat organlariga yordam berish) hisobga olib, 16 yil ozodlikdan mahrum qilish jazosini qamoq bilan bog‘liq bo‘lmagan yengilroq jazo turiga almashtirishni so‘ragan. 

Bundan tashqari, advokat mahkumlarga belgilangan 6,55 mlrd so‘m moddiy zararni to‘lashdan ozod qilishni ham so‘ragan.