Rossiyada safarbarlik davridagi «samovolka» uchun 471 ta ish ochildi

Ukrainada urush boshlanganidan beri Rossiya garnizon sudlari so‘roqsiz harbiy xizmat joyini tashlab ketish, buyruqlarni bajarmaslik, dezertirlik va safarbarlik davrida qat’iylashtirilgan boshqa moddalar bo‘yicha 247 ta ishda hukm chiqardi. Bu haqda 22 mart, chorshanba kuni «Mediazona» xabar bermoqda.

Sud statistikasini o‘rgangan jurnalistlarning ma’lumotlariga ko‘ra, Rossiya garnizon sudlariga jami 536 ta shunday ish kelib tushgan va ularning soni har oy o‘sib bormoqda.

Eng keng tarqalgan ayblov - so‘roqsiz harbiy xizmat joyini tashlab ketish («samovolka»). Sudga shu kabi 471 ta ish kelib tushgan, deya xabar berdi nashr. Shu bilan birga, ko‘plab harbiylarga shartli qamoq jazosi berilyapti, bu esa ularni frontga qaytarish imkonini yaratadi, deb yozadi «Mediazona».

2022 yil sentabr oyining oxirida Rossiya Jinoyat kodeksining harbiy qismidagi moddalar safarbarlik yoki harbiy harakatlar davrida sodir etilgan jinoyatlar bo‘yicha yangi qismlar bilan to‘ldirildi. «Mediazona» ma’lumotlariga ko‘ra, yangi moddalar bo‘yicha jarayonlar 2022 yil noyabr oyida boshlangan.

21 mart kuni huquq himoyachisi Pavel Chikov ommaviy axborot vositalari materiallariga tayanib, Rossiya Oliy sudi yaqin orada harbiy jinoyatlar bo‘yicha o‘z amaliyotini o‘zgartirishini taxmin qildi. Xususan, harbiy qismni o‘zboshimchalik bilan tashlab ketganlik va harbiy xizmatchi ikki kundan kam vaqt davomida bo‘linmada bo‘lmagan hollarda jinoyat ishi qo‘zg‘atilishi mumkin bo‘ladi, dedi u.