AQShda eng yirik kriptobirja - Binance sudga berildi

AQSh tovar fyucherslari savdo komissiyasi (CFTC) dunyodagi eng yirik kriptovaluta birjasi Binance va uning bosh direktori Changpeng Chjao ustidan sudga murojaat qildi. CFTC'ning 27 mart, dushanba kuni e’lon qilingan press-relizida ta’kidlanganidek, bunga tovar birjalari to‘g‘risidagi qonunning, shuningdek, regulyator qoidalarining bir necha bor buzilishi sabab bo‘lgan.

Da’voga ko‘ra, Binance 2019 yil iyul oyidan beri AQSh fuqarolariga derivativ savdoni taklif qilmoqda, ammo uning muvofiqlik dasturi samarasiz. Bundan tashqari, kompaniya o‘z xodimlari va mijozlariga korporativ foydani maksimal darajada oshirish uchun nazoratni chetlab o‘tishni tavsiya qilgan, deyiladi hujjatda.

CFTC ma’lumotlariga ko‘ra, ko‘rib chiqilayotgan davrning aksariyat qismida Binance o‘z mijozlaridan platformada savdo qilishdan oldin identifikatsiya ma’lumotlarini taqdim etishni talab qilmagan, garchi qonun bo‘yicha fyuchers treyderlari bunday ma’lumotlarni to‘plashlari shart. Bundan tashqari, Binance, CFTC ma’lumotlariga ko‘ra, terrorizmni moliyalashtirish va pul yuvishning oldini olish uchun mo‘ljallangan asosiy muvofiqlik tartib-qoidalarini amalga oshirmagan.