Lempard mavsum yakuniga qadar «Chelsi»ni boshqaradi 

Klub rasmiy sayti xabariga ko‘ra, Lempard mavsum yakuniga qadar jamoada bosh murabbiy vazifasini bajaruvchi etib tayinlangan. U klubni tark etgan Grem Potter o‘rnini egalladi. 

Avvalroq, insayder Fabritsio Romano Frenk Lempardning mavsum yakuniga qadar jamoada bosh murabbiy vazifasini bajaruvchi sifatida ish olib borishi hal qilingan masala ekani, angliyalik mutaxassisga uning jamoadagi sobiq sherigi Eshli Koul yordam berishi haqida xabar qilgandi.

Sky Spors xabariga ko‘ra, Lempard «Chelsi»dagi dastlabki mashg‘ulotlarini bugun, 6 aprel kuni o‘tkazadi. U 8 aprel kuni «Vulverhempton»ga qarshi bahsda jamoani murabbiy sifatida boshlab tushadi.

Eslatib o‘tamiz, Lempard «Everton»dan iste’foga chiqqach, hozirgacha ishsiz edi. U 2019-2021 yillarda «Chelsi» bosh murabbiyi sifatida faoliyat yuritgan. Qolaversa, 2001-2014 yillar davomida londonliklar safida to‘p surgan.