YeI O‘zbekiston uchun GSP+ tizimi benefitsiari maqomini uzaytirishi mumkin

Muzokaralar chog‘ida 2024-2034 yillarga mo‘ljallangan yangi muddatga mamlakat uchun GSP+ tizimi benefitsiari maqomini uzaytirish choralari ko‘rib chiqildi. YeI delegatsiyasi O‘zbekiston zarur konvensiyalarni ratifikatsiya qilgani va ushbu tizimning benefitsiarlari maqomini uzaytirish uchun barcha asoslarga ega ekanini ta’kidladi.

Tomonlar O‘zbekistonning Jahon savdo tashkilotiga kirish jarayonini muhokama qildi. Yevroparlament vakillari YeI rahbariyatining bu jarayonda yaqin hamkorlik qilish hamda konsalting va texnik yordam ko‘rsatishni davom ettirishga sodiqligini bildirdi.

O‘zbekiston bilan YeI o‘rtasida kengaytirilgan sheriklik va hamkorlik to‘g‘risidagi bitim loyihasi yuzasidan muzokaralar muvaffaqiyatli yakunlangani hamda parafinlangani qayd etildi. Hujjat ichki tartib-qoidalar, shu jumladan huquqiy ekspertiza va tomonlarning davlat tillariga tarjima qilinganidan keyin imzolanadi.

Ikki tomonlama tadbirlar o‘tkazish va tajriba almashish masalalari yuzasidan fikr almashildi. Savdo va investitsiyalar bo‘yicha O‘zbekiston – YeI quyi qo‘mitasi navbatdagi yig‘ilishini joriy yilning iyun oyida Bryussel shahrida tashkil etish, iqtisodiy sohada boshqaruv samaradorligini oshirish bo‘yicha mutaxassislar darajasida doimiy maslahatlashuvlar o‘tkazish amaliyotini davom ettirishning maqsadga muvofiqligi to‘g‘risida fikrga kelindi.