AQShda bir necha rossiyalikka qarshi ayblovlar qo‘yildi

AQSh Adliya vazirligi 18 aprel, seshanba kuni to‘rt nafar amerikalik va uch nafar rossiyalikka nisbatan yangi ayblovlarni e’lon qildi. Tegishli xabar idora matbuot xizmati tomonidan taqdim etildi.

Ularning barchasi Rossiya hukumati nomidan va Rossiya Federal xavfsizlik xizmati («FSB») bilan hamkorlikda ishlaganlikda ayblanmoqda. Ularning faoliyati Amerika Qo‘shma Shtatlarida zararli xorijiy ta’sir o‘tkazish maqsadidagi ko‘p yillik kampaniya ekani aytiladi. Boshqa narsalar qatorida, qo‘shimcha ayblov xulosasida rossiyaliklar «Amerika siyosiy guruhlarini Rossiya hukumatining ro‘yxatdan o‘tmagan noqonuniy agentlari sifatida faoliyat yuritish, janjal ko‘tarish va rossiyaparast tashviqotni tarqatish uchun yollagan, moliyalashtirgan va yo‘naltirgan».

Ayblovlar Moskvada yashovchi Aleksandr Ionov hamda «FSB»xodimlari Aleksey Suxodolov va Yegor Popovga qo‘yilgan, deyiladi vazirlik bayonotida. «Rossiya Tashqi razvedka xizmati bizning Birinchi tuzatishga kiritilgan huquqlarimizdan – Rossiya o‘z fuqarolariga rad etayotgan erkinliklardan – amerikaliklarni bo‘lish va AQSh saylovlariga aralashish uchun foydalangan», dedi bosh prokuror yordamchisi Metyu G. Olsen.

Bundan tashqari, xabarda aytilishicha, Ionovning vazifalaridan biri Amerika aholisi tomonidan Rossiyaning Ukrainadagi hududlarni qo‘shib olishini qo‘llab-quvvatlash ko‘rinishini yaratish edi.