Misr hukumati gepatitga qarshi dorining dastlabki partiyasini O‘zbekistonga yubordi

Joriy yilning 29 aprel kuni Misr hukumati tomonidan mamlakat shifoxonalarida foydalanish uchun insonparvarlik yordami sifatida ajratilgan, dunyoda keng tarqalgan kasalliklardan biri – S gepatitiga qarshi dori vositasining dastlabki partiyasi Toshkent xalqaro aeroportida kutib olindi, deb xabar bermoqda «Dunyo».

Foto: Dunyo

Mamlakatning Qohiradagi elchixonasi tomonidan ishlab chiqilgan mazkur yukning olib kelinishi O‘zbekiston va Misr o‘rtasida sog‘liqni saqlash sohasida hamkorlikni yanada jadallashtirish, virusologiyada o‘zaro qo‘llab-quvvatlashni tashkil etish doirasida avval erishilgan kelishuvlarning amaliy natijasidir.

Umumiy qiymati 35 ming AQSh dollarini tashkil etgan 17 ming qutidan ortiq dori vositasi O‘zbekiston Sog‘liqni saqlash vazirligi huzuridagi Virusologiya ilmiy-tekshirish instituti tomonidan shifotalab bemorlar uchun ishlatiladi.

O‘zbekiston va Misr sog‘liqni saqlash idoralari 2023-2024 yillar davomida umumiy qiymati 4,8 million dollarlik jami 800 ming dona (40 tonnaga yaqin) S gepatitiga qarshi dori vositalarini bepul yetkazib berish bo‘yicha kelishuvga erishgan.