To‘qayev 70 yoshini nishonlashdan bosh tortdi

Qozog‘iston prezidenti Qosim-Jo‘mart To‘qayevning 70 yilligi munosabati bilan hech qanday bayram tadbirlari o‘tkazish rejalashtirilmagan. Bu haqda prezident matbuot kotibi Ruslan Jyeldibay xabar berdi.

Unga ko‘ra, davlat rahbari 17 mayni odatdagidek o‘tkazadi.

«Bu prezidentning prinsipial pozitsiyasi. Shu kuni uning Xitoyga davlat tashrifi boshlanadi. Qozog‘istonda tug‘ilgan kun munosabati bilan yoki Xitoyga tashrif doirasida hech qanday tadbir bo‘lmaydi», dedi Jyeldibay.

Qosim-Jo‘mart To‘qayev 1953 yil 17 mayda Olma-ota shahrida tug‘ilgan.

To‘qayev bu kunni nishonlashni yoqtirmaydi, degan edi avvalroq uning matbuot kotibi Berik Uali. Prezident oilasida bunday an’ana yo‘q, farzandlarining ham, ota-onalarning ham tug‘ilgan kunini nishonlash odat tusiga kirmagan.