Ekologlar BAAni BMT iqlim konferensiyasi mezboni sifatida tanqid qilyapti

5 iyun, dushanba kuni Bonnda BMTning iqlim o‘zgarishi bo‘yicha ikki haftalik konferensiyasi (SB58) boshlandi, uning davomida butun dunyodan kelgan delegatlar COP28 iqlim konferensiyasiga yechimlar tayyorlashi kutilmoqda. COP28 30 noyabrdan 12 dekabrgacha Dubayda o‘tkazilishi rejalashtirilgan.

Germaniya hukumatining iqlim bo‘yicha maxsus vakili Jyennifer Morgan "global iqlim siyosati uchun keng koalitsiya" tuzishga chaqirdi. Bonn Birlashgan Arab Amirliklarida COP28 iqlim konferensiyasini muvaffaqiyatli o‘tkazish yo‘nalishini belgilashi kerak, dedi u.

Shu bilan birga, BAA mezbon davlat sifatida ekologiya tashkilotlari tomonidan tanqid qilinyapti. Germanwatch xalqaro iqlim siyosati rahbari Devid Rayfishning so‘zlariga ko‘ra, "Birlashgan Arab Amirliklari Jahon iqlim konferensiyasiga raislik qilar ekan, neft va gaz davrini uzaytirish bo‘yicha o‘z kun tartibini ommaviy ravishda olg‘a surishga harakat qiladi". 

Ayni paytda, BAA sanoat vaziri va Abu-Dabi milliy neft kompaniyasi (ADNOC) bosh direktori Sulton bin Ahmad Al-Jobir uning mamlakati bahsli masalalarda konsensusga erishmoqchi ekanligini aytdi. U konferensiya maqsadini “muvozanatli, ammo ayni paytda ulkan natija” deb atadi.