Koreya O‘zbekiston qishloq xo‘jaligini dronlar bilan ta’minlash niyatida

Toshkentda Qishloq xo‘jaligi vazirligi mutasaddilari hamda Janubiy Koreyaning KOTRA agentligi vakillari o‘rtasida uchrashuv o‘tkazildi. Uchrashuvda O‘zbekiston bilan hamkorlik munosabatlarini o‘rnatish istagida bo‘lgan koreyalik yetakchi korxonalarning uchuvchisiz parvoz apparatlari taqdim etildi.

Janubiy Koreyaning Geospatial Information, HUINS, PRENEU, Samsung drone, Meissa va SEESAW D&U kompaniyalari ishlab chiqargan va aynan qishloq xo‘jaligida qo‘llash mumkin bo‘lgan dronlar – uchuvchisiz parvoz apparatlari bilan o‘zbekistonlik mutaxassislar tanishtirildi.

Tadbirda koreyalik mutaxassislar ishlab chiqqan yuqori unumdor va ko‘p funksiyali dronlar, sun’iy intellekt texnologiyalari, ekin ekish ishlarining kompleks monitoringi, o‘g‘itlash va o‘simliklar kasallanishiga qarshi kurashni yuqori aniqlikda o‘tkazish imkonini beruvchi innovatsion yechimlardan O‘zbekiston qishloq xo‘jaligida foydalanish imkoniyatlari muhokama etildi.