Hisobot: Kiyevga yordam berish bo‘yicha va’dalar ko‘lami pasaymoqda

Ukrainaning qarshi hujumiga qaramay, 2023 yilning bahorida uchinchi mamlakatlardan Kiyevga yordam berish bo‘yicha yangi majburiyatlarning umumiy miqdori avvalgi davrlarga nisbatan past bo‘ldi. Bu haqda Kildagi Jahon iqtisodiyoti instituti (IfW) 6 iyul, payshanba kuni chop etilgan hisobotida aytiladi.

Yangi va’dalar ko‘lami yil boshidagidek katta emas, harbiy texnika yetkazib berish esa avval e’lon qilinganidan ancha past, deyiladi «Ukrainani qo‘llab-quvvatlashni kuzatish» dasturi doirasidagi hisobotda. 

25 fevraldan 31 maygacha qayd etilgan majburiyatlarning qiymati 13 milliard yevroga oshib, jami 165 milliard yevroga yetdi. Bu mablag‘ning deyarli 9 milliard yevrosi va’da qilingan harbiy yordamdir, deydi tahlilchilar. 

Germaniya mutlaq ko‘rsatkichlarda harbiy yordam bo‘yicha ikkinchi o‘rinda turadi. Germaniya harbiy majburiyatlarini 3,26 milliard yevroga (76 foizga) - 7,5 milliard yevrogacha oshirdi. Gap, xususan, Ukraina havo mudofaasini kuchaytirish uchun jangovar tanklar, Iris-T qisqa va o‘rta masofali raketalar va qurollarning qo‘shimcha yetkazib berilishi haqida ketmoqda. Yevropa Ittifoqi qo‘llab-quvvatlashni bir milliard yevrolik ikki transhga oshirib, 5,6 milliard yevroga yetkazdi. 

«Urush boshlanganining bir yilligi oldidan yangi va’dalar ko‘payganidan so‘ng, Ukraina tarafdorlarining umumiy va’dalari pasayish tendensiyasida bo‘lib turibdi», - deydi tahlil guruhi rahbari Kristof Trebesh. 

«Va’da qilingan va yetkazib berilgan harbiy texnika o‘rtasidagi tafovut katta», deya qo‘shimcha qildi IfW. «Bu, ayniqsa, Yevropa Ittifoqi davlatlari, shuningdek, AQSh hissasiga to‘g‘ri keladi», - deb ta’kidlaydi tahlilchilar. G‘arbiy sheriklar, xususan, AQSh, Germaniya va Buyuk Britaniya o‘z va’dalari ko‘lamini faol ravishda oshirdi, ammo yetkazib berish e’lon qilinganidan ancha past, deydi ekspertlar. Shu bilan birga, Chexiya, Sloveniya, Polsha va Slovakiya kabi Sharqiy Yevropa davlatlari va’da qilingan og‘ir qurollarning 80 foizdan ortig‘ini yetkazib berdi. 

Avvalroq, 21 fevral kuni Kildagi Jahon iqtisodiyoti instituti AQSh yanvar oyi o‘rtalariga kelib Ukrainani qo‘llab-quvvatlash uchun taxminan 73,1 milliard yevro ajratganini, Yevropa Ittifoqi esa 54,9 milliard yevro va’da qilganini bildirgan edi.