Hollivud aktyorlari ssenariy mualliflari ortidan ish tashlash e’lon qildi

Kinoaktyorlar gildiyasi va Amerika televideniye va radio artistlari federatsiyasi (SAG-AFTRA) qo‘shma kasaba uyushmasi kinostudiyalar va striming platformalari bilan muvaffaqiyatsiz muzokaralardan so‘ng Hollivud aktyorlarining ish tashlashi to‘g‘risida e’lon qildi. 

Kasaba uyushmasi ma’lumotlariga ko‘ra, aksiya AQSh g‘arbiy sohil vaqti bilan 14 iyul yarim tunda (Toshkent vaqti bilan 12:00) boshlanadi. 

«To‘rt haftadan ko‘proq davom etgan muzokaralardan so‘ng, Kino va televideniye prodyuserlari alyansi (AMPTP) SAG-AFTRA a’zolari uchun muhim bo‘lgan asosiy muammolarni hal qilish uchun adolatli kelishuv taklif qilishni istamayapti», deyiladi qo‘shma kasaba uyushmasi saytidagi bayonotda.

SAG-AFTRA bosh muzokarachisi Dankan Krebtri-Ayrlend Los-Anjyelesdagi matbuot anjumanida aytganidek, ish tashlash - «bu oxirgi chora». 

Ish tashlash vaqtida aktyorlar suratga olish ishlari va reklama kampaniyalarida qatnashmaydi, shuningdek, filmlar va seriallar premeralarida ishtirok etmaydi. 

SAG-AFTRA - kino, televideniye va radio sanoatida ishlaydigan 160 mingga yaqin kishidan iborat eng yirik aktyorlar uyushmasi a’zolari ikki yarim oydan beri ish tashlashni davom ettirayotgan Hollivud ssenariynavislariga qo‘shiladi. 

Bu 63 yil ichida Amerika kino sanoatidagi eng yirik ish tashlashdir. Hollivud tarixida oxirgi marta aktyorlar va yozuvchilar birgalikda 1960 yilda ish tashlash uyushtirgan. 

May oyi boshida ish tashlashni boshlagan SAG-AFTRA ham, Amerika ssenariynavislari uyushmasi (WGA) ham striming servislarida filmlar takroriy ko‘rsatilganida yuqori bazaviy haq va to‘lovlar to‘lanishini talab qilmoqda. Shuningdek, ular o‘z ishlari sun’iy intellekt bilan almashtirilmasligiga kafolat berilishini so‘rayapti.