Aktrisa Dayan Kiton vafot etdi

Afsonaviy amerikalik aktrisa Dayan Kiton 79 yoshida Kaliforniyadagi uyida vafot etdi, deb xabar berdi uning oilasi Amerikaning People portaliga. New York Times manbasi ham aktrisaning vafotini tasdiqladi. Uning o‘limi sabablari noma’lum, biroq aktrisa so‘nggi bir necha oy mobaynida omma oldida ko‘rinish bermayotgandi.

Asli ismi-sharifi Dayan Holl bo‘lgan aktrisa 1946 yilda Los-Anjyelesda tug‘ilgan, 1970 yilda «Lyubovniki i drugiye neznakomsy» komediyasida debyut qilgan. Aktrisa Frensis Ford Koppolaning «Cho‘qintirgan ota» (1972) filmidan keyin mashhurlikka erishgan, bu filmda u bosh qahramon, Al Pachino ijrosidagi Maykl Korleonening rafiqasi Key Adams rolini o‘ynagandi. Keyinroq filmning ikki sikvelida ham qatnashgan.

U o‘tgan asrning 70-yillarida Vudi Allen bilan hamkorlik qila boshlaydi hamda uning «Sevgi va o‘lim» (1975) va «Enni Holl» (1977) kabi filmlarida suratga tushadi. 1977 yilda aynan «Enni Holl» filmidagi roli uchun eng yaxshi aktrisa sifatida «Oskar» mukofotiga sazovor bo‘ladi.

U, shuningdek, «Qizillar» (1981), «Marvin xonasi» (1996) hamda «Qoidalar va qoidasiz sevgi» (2003) filmlaridagi rollari uchun «Oskar»ga nomzod bo‘lgan.

Kiton yana bir qator film va seriallarda, jumladan, «Dorini qidirish», «Kitob klubi», «Oilaviy tosh», «Chunki men shuni xohlayman» kabilarda rol o‘ynagan.

Hollivuddagi hamkasblari bilan ishqiy munosabatlar haqidagi mish-mishlarga qaramay, Dayan Kiton hech qachon turmushga chiqmagan.

U ikki bola asrab oladi: 1996 yilda asrab olgan qiziga «Filadelfiya hikoyasi» filmida Keri Grant o‘ynagan personaj sharafiga Dekster ismini qo‘ygan.To‘rt yil o‘tib asrab olgan o‘g‘lini Dyuk deb atagan. «Onalik meni butunlay o‘zgartirib yubordi», – degandi u o‘shanda.

U bilan «Birinchi rafiqalar klubi» filmida birga ishlagan hamkasbi Bett Midler Instagramda shunday deb yozdi: «Yorqin, go‘zal, g‘ayrioddiy Dayan Kiton vafot etdi. Bundan qanchalik xafa bo‘lganimni tasvirlab berolmayman. U nihoyatda kulgili, mutlaqo o‘ziga xos, bunday yulduzdan kutish mumkin bo‘lgan hech qanday ayyorlik va raqobat yo‘q edi».

Aktyor Ben Stiller X ijtimoiy tarmog‘ida shunday post qoldirdi: «Dayan Kiton. Barcha davrlarning eng buyuk kino aktrisalaridan biri. Uslub, hazil va komediya timsoli. Yorqin shaxs».

Aktrisa 1993 yilda Alsgeymer kasalligi tashxisi qo‘yilgan onasiga 2008 yilda vafot etguniga qadar g‘amxo‘rlik qilgandi.

«U men uchun hamma narsa edi, – derdi u onasi haqida. – U juda ajoyib edi. U men uchun hayotda erishish mumkin bo‘lgan narsalarning namunasi edi. U eng yaxshi narsalarning yuragi edi».

Kiton, shuningdek, 2021 yilda ko‘p yil davom etgan ruhiy xastalikdan so‘ng vafot etgan akasi Rendining asosiy vasiysi bo‘lgan, deb yozadi Guardian.