Aktyor Keri-Hiroyuki Tagava vafot etdi

Amerikalik aktyor Keri-Hiroyuki Tagava 75 yoshida vafot etdi. Bu haqda Deadline nashri uning oila a’zolariga asoslanib xabar bermoqda. 

Tagava Santa-Barbaradagi (Kaliforniya shtati) uyida, o‘z farzandlari davrasida insult asoratlari tufayli vafot etgan.

Keri-Hiroyuki Tagava 1950 yilda Tokioda tug‘ilgan. Uning otasi Amerika armiyasida xizmat qilgani tufayli oila tez-tez ko‘chib yurishiga to‘g‘ri kelgan, yakunda Kaliforniyada muqim o‘rnashgan. Tagavaning onasi Yaponiyada teatr aktrisasi edi va farzandidan aktyorlik kasbini tanlamaslikni so‘ragan. Tagava o‘z aktyorlik faoliyatini 36 yoshga chiqqanida boshlagan. 

Tagava rejissyor Bernardo Bertoluchchining 1987 yilda ishlangan «So‘nggi imperator» filmidagi ijrosi bilan tanila boshlagan. Bu kartina «Eng yaxshi film» yo‘nalishida Oskar mukofotini qo‘lga kiritgan. 1995 yilda o‘yin motivlari asosida ishlangan Mortal Kombat («Ajalvor jang») filmidagi afsungar Shan Tsun rolidan keyin esa katta mashhurlikka erishadi. Keyinroq «Ajalvor jang: Meros» (2013) va «Ajalvor jang X: Avlod» (2015) seriallaridagi epizodlarda bu rolga qaytadi. 

Tagava Tekken videoo‘yini asosida suratga olingan «Tekken» va «Tekken 2» filmlarida ham yovuz qahramon Heyxati Misimu rolini ijro etgan. Aktyorning boshqa mashhur filmlari qatorida «Qotillik uchun litsenziya» (Licence to Kill), «Ko‘tarilayotgan quyosh» (Rising Sun), «Perl-Harbor», «Maymunlar sayyorasi», «47 ronin»,
«Geyshaning memuarlari» kabilarni sanash mumkin.