Yevropa Ittifoqidagi gaz omborlari 90 foizga to‘ldi

Belgilangan muddatga ikki yarim oy qolganida Yevropa Ittifoqidagi gaz omborlari 90 foizga to‘ldi. Shu tariqa, Yevropa Ittifoqi yaqinlashib kelayotgan qish mavsumiga «yaxshi tayyorgarlik ko‘rdi», deya ma’lum qildi Yevrokomissiya 18 avgust, juma kuni.

Gas Infrastructure Europe (GIE) portalining 16 avgustdagi ma’lumotlariga ko‘ra, Yevropa Ittifoqidagi gaz omborlarini to‘ldirish darajasi o‘rtacha 90,12 foizni tashkil qilgan. Shu bilan birga, Ispaniyada bu ko‘rsatkich 100 foizga yaqinlashdi, Latviyada - 77 foiz, Germaniyada - deyarli 92 foiz.

Germaniya kelgusi qishda yuzaga kelishi mumkin bo‘lgan muammolar haqida ogohlantirmoqda

1 noyabrga qadar gaz omborlarini 90 foizga to‘ldirish to‘g‘risida qaror Yevropa Ittifoqining 27 davlati tomonidan 2022 yil yozida Rossiyaning Ukrainaga keng ko‘lamli bostirib kirishi boshlanganidan keyin u bilan iqtisodiy aloqalarning keng ko‘lamli uzilishi fonida qabul qilingan edi. Ayni paytda, shu yilning yozida Germaniyaning Federal tarmoq agentligi kelgusi qishda energiya ta’minoti bilan bog‘liq ehtimoliy muammolar haqida ogohlantirdi. Vaziyatni past harorat, qo‘shni mamlakatlarda energiya ta’minoti bilan bog‘liq muammolar, shuningdek, gaz omborlarini yetarli darajada to‘ldirilmagani yanada og‘irlashtirishi mumkin, dedi agentlik rahbari Klaus Myuller.

2023 yilning birinchi choragida Yevropa Ittifoqi tomonidan import qilinadigan tabiiy gazning umumiy hajmida Rossiyadan yetkazib berish ulushi 15 foizni tashkil etgan bo‘lsa, bir yil avval bu ko‘rsatkich 30 foizni tashkil etgan edi. Yevropaliklar tobora ko‘proq Rossiya gazini AQShdan suyultirilgan gaz va Norvegiyadan yetkazib berish jarayoni bilan almashtirmoqda. Bundan tashqari, Yevropa Ittifoqi davlatlari 2023 yil aprelidan 2024 yilning martigacha bo‘lgan davrda gaz iste’molini 2017-2022 yillardagi o‘rtacha ko‘rsatkichga nisbatan 15 foizga kamaytirish majburiyatini oldi. Shu bilan birga, 2022 yil avgust – 2023 yil may oylarida Yevropa Ittifoqida gaz iste’molining o‘rtacha darajasi avvalgi besh yildagi o‘rtacha ma’lumotlarga nisbatan 18 foizga kamaydi.