Shavkat Mirziyoyev Ozarboyjonga boradi

O‘zbekiston prezidentining Ozarboyjonga davlat tashrifiga doir rasmiy ma’lumot berildi. Unga ko‘ra, Shavkat Mirziyoyev Ozarboyjon prezidenti Ilhom Aliyevning taklifiga binoan 22-23 avgust kunlari davlat tashrifi bilan ushbu mamlakatda bo‘ladi.

Tashrif dasturida oliy darajadagi muzokaralar hamda ikki mamlakat yetakchilari ishtirokidagi boshqa tadbirlar o‘tkazilishi ko‘zda tutilgan. 

Kun tartibidan O‘zbekiston-Ozarboyjon strategik sheriklik munosabatlarini yanada mustahkamlash va ustuvor yo‘nalishlardagi amaliy hamkorlikni kengaytirish masalalari o‘rin olgan.

Muzokaralar yakunida ikki tomonlama bitimlar qabul qilinishi rejalashtirilgan.