Ronaldu «Siti» yulduzini kutmoqda, Benzema esa - Salohni. So‘nggi transfer xabarlari

Yevropada transferlar oynasi yopilishiga oz vaqt qolmoqda. Yangi shov-shuvli transferlar kam, ammo ko‘plab klublar hali tarkibini mustahkamlashni davom ettirmoqda.

«Siti» De Bryuynega o‘rinbosar qidirmoqda

«Manchester Siti»ning asosiy yetakchisi Kevin De Bryuyne – jarohat tufayli kamida yil oxirigacha safdan chiqdi. Klub maydon markazini mustahkamlashga harakat qilmoqda. Nomzodlardan biri – Mateus Nunes. Fabritsio Romanoning yozishicha, «Siti» «Vulverhempton»ga ushbu 24 yoshli futbolchi uchun 50 mln yevro taklif qilgan. Futbolchining o‘zi «Siti» bilan shaxsiy shartnomani kelishib qo‘ygan, ammo Sky Spors ma’lumotiga ko‘ra, «bo‘rilar» «shaharliklar»ning birinchi taklifini rad etgan. Nunes «Vulvz»ga 2022 yil yozida «Sporting»dan 45 mln yevro va 5 mln yevro miqdoridagi bonuslar evaziga o‘tgandi.

Shuningdek, klub «Kristal Pelas» yarimhimoyachisi Eberechi Ezeni sotib olish haqida ham o‘ylamoqda.

«Siti» asosiy futbolchilari bilan shartnomalarni yangilashni ham unutmayapti. Yoz davomida jamoa yarimhimoyachisi Bernardu Silva goh «Barsa»ga, goh «PSJ»ga, goh Saudiya Arabistoniga yuborilgandi. Yakunda portugaliyalik futbolchi Manchesterda qoladigan bo‘ldi.

Silva «shaharliklar» bilan shartnomasini 2026 yil yoziga qadar uzaytirdi. Bernardu yana uch mavsum davomida «Etihad»dagi muxlislarni xushnud etishda davom etadi.

«Nottinghem» jahon chempionini safiga qo‘shib oldi

APL ishtirokchisi bo‘lgan «Nottinghem Forest» «Sevilya»dan argentinalik himoyachi Gonsalo Montielni ijaraga oldi. Mavsum yakunida inglizlar klubi uning shartnomasini 11 million yevroga sotib olishi mumkin.

Montiel «Sevilya»da ikki mavsum o‘ynadi va Yevropa Ligasida g‘olib bo‘ldi. 26 yoshli futbolchi Qatardagi JCh-2022 finalida Argentinaning Fransiyaga qarshi penaltilar seriyasida yakuniy g‘alaba zarbasi muallifi bo‘lgandi.

«Yunayted» tarbiyalanuvchisidan voz kechdimi?

«MYu» transferlar oynasi davomida darvozabon Andre Onanani sotib olgandi, endi esa bu ampluaga turkiyalik Altay Bayindirni ham olib kelmoqchi. Jamoa tarbiyalanuvchisi Din Henderson esa ketishi mumkin. Fabritsio Romanoning yozishicha, «Yunayted» darvozabonni sotib olish sharti bilan ijaraga beradi. Henderson yaqin vaqtlar ichida klubni tark etadi, uning uchun asosiy da’vogar – «Kristal Pelas».

«Bavariya»da Noyyer uchun vaqtincha o‘rinbosar Isroildan topildi

Here We Go! Fabritsio Romano «Bavariya» darvoza chizig‘iga kimni olayotganini tasdiqladi. Insayder xabariga ko‘ra, Myunxenga Tel-Avivning «Makkabi» klubi a’zosi Daniel Perets tashrif buyuradi. 23 yoshli isroillik posbonning transferi uchun 5 mln yevro to‘lanadi, bonuslar ham ko‘zda tutilgan. Perets bilan shartnoma 2028 yilga qadar tuziladi. Daniel Isroil jamoasi bilan yoshlar o‘rtasidagi Yevro-2023 turnirida qatnashib, jamoa yarimfinalga yetib borishida o‘z hissasini qo‘shgandi.

Saudiyaliklar klubi «PSJ» sardoriga qarmoq tashlamoqda

RMC Sport xabariga ko‘ra, «Al-Ittihod» «PSJ» himoyachisi Markinosni transfer qilmoqchi. Saudiyaliklar klubi mudofaa markazi uchun futbolchi qidirmoqda va aynan braziliyalik tajribali futbolchi klub short-listidan joy olgan. Qayd etilishicha, Markinosning o‘zi fransuzlar jamoasida qolishni istamoqda. Ammo saudiyaliklarning pullari 2023 yil yozida ko‘p futbolchilarni fikrini o‘zgartirishga majbur qildi, jumladan «PSJ» futbolchisining ham. Hozirda «Al-Ittihod» — Markinos munosabatlarida nuqta qo‘yilmagan.

Saudiya Arabistoniga yana bir yulduz yo‘l oladimi?

«Al-Ittihod» nishonidagi futbolchilar Markinos bilan cheklanib qolmaydi. Jurnalist Rudi Galettining xabar qilishicha, saudiyaliklar klubi «Liverpul» forvardi Muhammad Saloh transferi uchun 90 mln yevrodan ortiq mablag‘ to‘lashga tayyor.

Mersisaydliklar ustozi Yurgen Klopp esa 31 yoshli misrlik futbolchi sotilishiga qarshi. Ammo «Al-Ittihod» katta miqdordagi tovon puli bilan rahbariyat va murabbiyni ko‘ndirishi mumkin.

Avgust oyi boshida klub ushbu futbolchi bilan aloqaga chiqqani haqida xabarlar paydo bo‘lgandi. Salohga ikki mavsum uchun 180 million yevro taklif qilingan.

Agar «qizillar» misrlik futbolchini qo‘yib yuborishga rozi bo‘lsa, Saudiya Arabistoni chempionati tarixidagi eng qimmatbaho transferlardan biriga aylanadi. Ayni vaqtda «Al-Ittihod» safida Karim Benzema va N’Golo Kante ham to‘p surmoqda, Saloh ular bilan uchlik tashkil qiladimi, muxlislar buni yaqin vaqtlar ichida bilib olishi mumkin.

«PSJ»ning yosh forvardi APLga o‘tishga yaqin

Transfer dayjestida «PSJ»ga aloqador yana bir xabar. L’Equipe nashri yozishicha, «Vest Hem» yosh forvard Ugo Ekitike transferiga qiziqmoqda. Londonliklar futbolchini mavsum yakunida 35 mln yevroga sotib olish sharti bilan ijaraga olishi mumkin. Avvalroq parijliklar Ekitikeni Frankfurtning «Ayntraxt» klubi forvardi Randal Kolo Muani transferiga qo‘shishni rejalashtirayotgani xabar qilingandi. O‘tgan mavsumda «PSJ»ning ikki futbolchisi «Vest Hem»ga yuborilgandi: darvozabon Alfons Areola va himoyachi Tilo Kerer. Ekitike uchinchisi bo‘ladimi?

«Inter» va «Marsel» forvardlarini almashishi mumkin

Fabritsio Romanoning xabariga ko‘ra, «Marsel» argentinalik hujumchi Xoakin Korrea transferi bo‘yicha «Inter» bilan muzokaralarni boshladi. Italyanlar esa provansalliklar safini erkin agent sifatida tark etgan Aleksis Sanchesni tarkibga qo‘shib olishni istamoqda. Chililik futbolchi avval ham, 2019 yildan 2022 yilgacha «Inter»da o‘ynagan. Aleksis «Juzeppe Meatssa»ga qaytadimi?

«Siti» yulduzi Ronalduning yoniga kelmoqda

Saudiya Arabistonidan xabarlar – 2023 yil yozining klassikasiga aylandi. Yana bir katta transfer amalga oshishga yaqin. Fabritsio Romano xabariga ko‘ra, «Manchester Siti» himoyachisi Emerik Laport «An-Nasr»ga o‘tmoqda. 29 yoshli ispaniyalik himoyachi yangi klubi uchun tibbiy ko‘rikdan o‘tgan. Tez orada Laport «An-Nasr» bilan shartnoma imzolash uchun Ar-Riyodga uchadi. Emerik 2018 yildan buyon «Siti» safida to‘p tepayotgandi. Transfermarkt uning transferini 25 mln yevroga baholagan.